---
title: "ടി. പി. കുഞ്ഞിരാമൻ പുരസ്കാരം സഖാവ് പി. പി. ദാമോദരന്; 18-ന് എം. സ്വരാജ് സമ്മാനിക്കും"
english_title: "T P Kunjiraman Award "
publisher: "thaliparambanews.in"
canonical_url: "https://thaliparamba.truevisionnews.com/news/371731/t-p-kunjiraman-award"
published_at: "2026-07-10T22:09:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a51205664082_1000691637.jpg"
keywords: []
---

# ടി. പി. കുഞ്ഞിരാമൻ പുരസ്കാരം സഖാവ് പി. പി. ദാമോദരന്; 18-ന് എം. സ്വരാജ് സമ്മാനിക്കും

> **Lead Summary:** **ഏഴോo: **ഏഴോത്തെ കമ്മ്യൂണിസ്റ്റ് കർഷക പ്രസ്ഥാനത്തിന്റെ സമുന്നത നേതാവും ദീർഘകാലം പഞ്ചായത്ത് പ്രസിഡന്റുമായിരുന്ന സഖാവ് ടി. പി. കുഞ്ഞിരാമന്റെ സ്മരണയ്ക്കായി ഏർപ്പെടുത്തിയ പുരസ്കാരത്തിന് പ്രമുഖ സി.പി.ഐ(എം) നേതാവും മികച്ച സഹകാരിയുമായ സഖാവ് പി. പി. ദാമോദരൻ അർഹനായി. പൊതുപ്രവർത്തനം, സാംസ്കാരികം, സഹകരണം എന്നീ മേഖലകളിലെ അദ്ദേഹത്തിന്റെ മികച്ച സംഭാവനകളെ മുൻനിർത്തിയാണ് പുരസ്കാരം പ്രഖ്യാപിച്ചത്.

## Article Content

**ഏഴോo: **ഏഴോത്തെ കമ്മ്യൂണിസ്റ്റ് കർഷക പ്രസ്ഥാനത്തിന്റെ സമുന്നത നേതാവും ദീർഘകാലം പഞ്ചായത്ത് പ്രസിഡന്റുമായിരുന്ന സഖാവ് ടി. പി. കുഞ്ഞിരാമന്റെ സ്മരണയ്ക്കായി ഏർപ്പെടുത്തിയ പുരസ്കാരത്തിന് പ്രമുഖ സി.പി.ഐ(എം) നേതാവും മികച്ച സഹകാരിയുമായ സഖാവ് പി. പി. ദാമോദരൻ അർഹനായി. പൊതുപ്രവർത്തനം, സാംസ്കാരികം, സഹകരണം എന്നീ മേഖലകളിലെ അദ്ദേഹത്തിന്റെ മികച്ച സംഭാവനകളെ മുൻനിർത്തിയാണ് പുരസ്കാരം പ്രഖ്യാപിച്ചത്.

​ഈ വരുന്ന 18-ാം തീയതി വൈകിട്ട് അഞ്ച് മണിക്ക് ഏഴോത്ത് ടി. പി. സ്മാരക മന്ദിരത്തിൽ നടക്കുന്ന ചടങ്ങിൽ വെച്ച് സി.പി.ഐ(എം) സംസ്ഥാന സെക്രട്ടറിയേറ്റംഗം എം. സ്വരാജ് പുരസ്കാരം സമ്മാനിക്കും.

​കർഷകസംഘം ജില്ലാ പ്രസിഡന്റായും സംസ്ഥാന കമ്മിറ്റി അംഗമായും ദീർഘകാലം പ്രവർത്തിച്ചിട്ടുള്ള പി. പി. ദാമോദരൻ, 1965-ൽ സി.പി.ഐ(എം) കടന്നപ്പള്ളി - പാണപ്പുഴ ലോക്കൽ സെക്രട്ടറിയായാണ് പാർട്ടി നേതൃത്വത്തിലേക്ക് കടന്നുവരുന്നത്. തുടർന്ന് 12 വർഷം സി.പി.ഐ(എം) മാടായി ഏരിയാ സെക്രട്ടറിയായും, കാൽ നൂറ്റാണ്ടുകാലം സി.പി.ഐ(എം) കണ്ണൂർ ജില്ലാ കമ്മിറ്റി അംഗമായും അദ്ദേഹം മാതൃകാപരമായ പ്രവർത്തനങ്ങൾ കാഴ്ചവെച്ചു.

​സഹകരണ-ഭരണരംഗത്തെ സജീവ സാന്നിധ്യം

1988 മുതൽ 1995 വരെയുള്ള കാലയളവിൽ കടന്നപ്പള്ളി - പാണപ്പുഴ പഞ്ചായത്ത് പ്രസിഡന്റായി മികച്ച ഭരണം കാഴ്ചവെച്ച അദ്ദേഹം സഹകരണ മേഖലയിലും വലിയ മുദ്ര പതിപ്പിച്ചിട്ടുണ്ട്. ജില്ലാ ബാങ്ക് വൈസ് പ്രസിഡന്റ്, മാടായി സഹകരണ ബാങ്ക് പ്രസിഡന്റ്, പിലാത്തറ കോ-ഓപ്പറേറ്റീവ് കോളേജ് സ്ഥാപക പ്രസിഡന്റ്, സംസ്ഥാന പ്രൈമറി കോ-ഓപ്പറേറ്റീവ് അസോസിയേഷൻ സെക്രട്ടറി എന്നീ നിലകളിൽ ശ്രദ്ധേയമായ ചുമതലകൾ വഹിച്ചു.

​രാഷ്ട്രീയ-സാമൂഹിക പ്രവർത്തനങ്ങൾക്കൊപ്പം നാടകരംഗത്ത് അഭിനേതാവായും സംവിധായകനായും തിളങ്ങിയ അദ്ദേഹം, സംസ്കൃതത്തിൽ പ്രഗാഭമായ അറിവുള്ള മികച്ചൊരു വാഗ്മി കൂടിയാണ്. അർഹതയ്ക്കുള്ള അംഗീകാരമായി മാറിയ ഈ പുരസ്കാര ലബ്ധിയിൽ ഏഴോത്തെയും പരിസരപ്രദേശങ്ങളിലെയും പാർട്ടി പ്രവർത്തകരും പൊതുജനങ്ങളും സഖാവിന് അഭിനന്ദനങ്ങൾ നേർന്നു.

### Related Links & Sources
- [Original Story Source](https://thaliparamba.truevisionnews.com/news/371731/t-p-kunjiraman-award)