പരിയാരം: അരിപ്പാമ്പ്ര– അവുങ്ങും പൊയിലിൽ സ്ഥാപിക്കാൻ ഒരുങ്ങുന്ന ഗ്യാസ് പ്ലാന്റ് റീഫില്ലിംഗ് യൂണിറ്റിനെതിരെ പ്രദേശവാസികളുടെ പ്രതിഷേധം ശക്തമാകുന്നു. ജനങ്ങളുടെ സുരക്ഷയും പരിസ്ഥിതിയും മുൻനിർത്തി വിവിധ രാഷ്ട്രീയ, സാമൂഹിക, സാംസ്കാരിക രംഗങ്ങളിലെ പ്രതിനിധികളെയും ജനപ്രതിനിധികളെയും ഉൾപ്പെടുത്തി ജനകീയ ആക്ഷൻ കമ്മിറ്റി രൂപീകരിച്ചു. പദ്ധതി സംബന്ധിച്ച ജനങ്ങളുടെ ആശങ്കകൾ പരിഹരിക്കുന്നതിന് അധികൃതർ അടിയന്തരമായി ഇടപെടണമെന്നും, അല്ലാത്തപക്ഷം ശക്തമായ സമരപരിപാടികളുമായി മുന്നോട്ടുപോകുമെന്നും കമ്മിറ്റി മുന്നറിയിപ്പ് നൽകി.
പി. എം. അൽ അമീന്റെ അധ്യക്ഷതയിൽ ചേർന്ന യോഗം മുൻ പരിയാരം ഗ്രാമപഞ്ചായത്ത് അംഗം അഷ്റഫ് കൊട്ടോല ഉദ്ഘാടനം ചെയ്തു. ജനവാസ മേഖലയ്ക്ക് സമീപം ഇത്തരമൊരു ഗ്യാസ് റീഫില്ലിംഗ് യൂണിറ്റ് സ്ഥാപിക്കുന്നത് അപകടസാധ്യത വർധിപ്പിക്കുമെന്നും, ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കേണ്ടത് ഭരണകൂടത്തിന്റെ ഉത്തരവാദിത്തമാണെന്നും അദ്ദേഹം പറഞ്ഞു.
യോഗത്തിൽ പി. എം. അൽ അമീൻ (ചെയർമാൻ),അബ്ദുല്ല കല്ലിക്കടവ് (കൺവീനർ) , എ. എം. വിജയനെ (ട്രഷറർ),പരിയാരം ഗ്രാമപഞ്ചായത്ത് അംഗം റഹീമ കല്ലെടുത്ത്, കടന്നപ്പള്ളി–പാണപ്പുഴ ഗ്രാമപഞ്ചായത്ത് അംഗം മുബഷിർ ആലക്കാട്, ഗ്രിൽഗറി, ബിന്ദു രമേശൻ, ഷൈനി ഗംഗാധരൻ, ഹരിത എന്നിവരെ അംഗങ്ങളായും തിരഞ്ഞെടുത്തു.
ജംഷീർ ആലക്കാട്, എ. എം. വിജയൻ,, അജേഷ് പി, ഹരിത, അബ്ദുല്ല കല്ലിക്കടവ്, ഉമർ കുട്ടി അരിപ്പാമ്പ്ര എന്നിവർ സംസാരിച്ചു. അനീഷ് കുമാർ കെ. സ്വാഗതവും ബിന്ദു കെ ആർ നന്ദിയും പറഞ്ഞു.
Content Highlight: Local residents protest against the gas plant refilling unit proposed to be set up at Arippambra–Avungumpoyil.
