---
title: "സംസ്ഥാനത്ത് ഓണക്കിറ്റ് വിതരണം ഓഗസ്റ്റ് 10 മുതല്‍; മഞ്ഞ കാര്‍ഡ് ഉടമകള്‍ക്ക് 16 ഇനം സാധനങ്ങള്‍ അടങ്ങിയ കിറ്റ് നല്‍കുമെന്ന് മന്ത്രി അനൂപ് ജേക്കബ് "
english_title: "Onam kit 2026"
publisher: "thaliparambanews.in"
canonical_url: "https://thaliparamba.truevisionnews.com/news/374939/onam-kit-2026"
published_at: "2026-07-27T15:36:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a672db3870b4_1000733932.jpg"
keywords: []
---

# സംസ്ഥാനത്ത് ഓണക്കിറ്റ് വിതരണം ഓഗസ്റ്റ് 10 മുതല്‍; മഞ്ഞ കാര്‍ഡ് ഉടമകള്‍ക്ക് 16 ഇനം സാധനങ്ങള്‍ അടങ്ങിയ കിറ്റ് നല്‍കുമെന്ന് മന്ത്രി അനൂപ് ജേക്കബ് 

> **Lead Summary:** തിരുവനന്തപുരം: സംസ്ഥാനത്ത് ഈ വര്‍ഷത്തെ ഓണക്കിറ്റ് വിതരണം ഓഗസ്റ്റ് 10 മുതല്‍ ആരംഭിക്കുമെന്ന് ഭക്ഷ്യ-സിവില്‍ സപ്ലൈസ് മന്ത്രി അനൂപ് ജേക്കബ് അറിയിച്ചു. ഗുണഭോക്താക്കള്‍ക്ക് തുന്നിയ തുണിസഞ്ചി ഉള്‍പ്പെടെ ആകെ 16 ഇനം അവശ്യസാധനങ്ങളാണ് ഇത്തവണത്തെ ഓണക്കിറ്റില്‍ ഉള്‍പ്പെടുത്തിയിരിക്കുന്നത്.

## Article Content

തിരുവനന്തപുരം: സംസ്ഥാനത്ത് ഈ വര്‍ഷത്തെ ഓണക്കിറ്റ് വിതരണം ഓഗസ്റ്റ് 10 മുതല്‍ ആരംഭിക്കുമെന്ന് ഭക്ഷ്യ-സിവില്‍ സപ്ലൈസ് മന്ത്രി അനൂപ് ജേക്കബ് അറിയിച്ചു. ഗുണഭോക്താക്കള്‍ക്ക് തുന്നിയ തുണിസഞ്ചി ഉള്‍പ്പെടെ ആകെ 16 ഇനം അവശ്യസാധനങ്ങളാണ് ഇത്തവണത്തെ ഓണക്കിറ്റില്‍ ഉള്‍പ്പെടുത്തിയിരിക്കുന്നത്.

എ.എ.വൈ (മഞ്ഞ) കാര്‍ഡ് ഉടമകള്‍ക്കാണ് ഇത്തവണത്തെ ഓണക്കിറ്റിന് അര്‍ഹതയുള്ളത്. ഒരു കിറ്റിന് ഏകദേശം 854 രൂപ നിരക്കിലാണ് പൊതുവിപണിയില്‍ മൂല്യമുള്ള സാധനങ്ങള്‍ സൗജന്യമായി വിതരണം ചെയ്യുന്നത്.

ഓണക്കാലത്തോടനുബന്ധിച്ച് വിപണിയിലെ വിലക്കയറ്റം തടയുന്നതിനായി ഓഗസ്റ്റ് 8 മുതല്‍ സംസ്ഥാനത്ത് ഓണം ട്രേഡ് ഫെയറുകള്‍ക്ക് തുടക്കമാകും. ജില്ലാതലങ്ങളില്‍ ഓഗസ്റ്റ് 12 മുതലും, വിവിധ നിയോജകമണ്ഡലങ്ങളില്‍ അവസാന ആഴ്ചകളിലും പ്രത്യേക ഓണം ഫെയറുകള്‍ സപ്ലൈകോയുടെ നേതൃത്വത്തില്‍ സംഘടിപ്പിക്കുമെന്നും മന്ത്രി വ്യക്തമാക്കി.

പൊതുവിപണിയിലെ വിലക്കയറ്റം നിയന്ത്രിച്ചു നിര്‍ത്തുന്നതിനായി പുതിയ 'മാര്‍ക്കറ്റ് സ്ട്രാറ്റജി' നടപ്പിലാക്കാന്‍ സര്‍ക്കാര്‍ ആലോചിക്കുന്നുണ്ട്. ഇതിന്റെ ഭാഗമായി സപ്ലൈകോ വഴി നല്‍കുന്ന 13 ഇനം സബ്‌സിഡി സാധനങ്ങളുടെ ലഭ്യത സര്‍ക്കാര്‍ ഉടന്‍ തന്നെ ഉറപ്പാക്കും. അരിയുടെ വിലക്കയറ്റവുമായി ബന്ധപ്പെട്ട ആശങ്കകളില്‍ സര്‍ക്കാര്‍ ശക്തമായ ഇടപെടലുകള്‍ നടത്തിയിട്ടുണ്ടെന്നും മന്ത്രി കൂട്ടിച്ചേര്‍ത്തു.ടി

സംസ്ഥാനത്തെ നെല്‍കര്‍ഷകര്‍ക്ക് നല്‍കാനുള്ള കുടിശിക തുക മുഴുവന്‍ ഓണത്തിന് മുന്‍പായി വിതരണം ചെയ്തു തീര്‍ക്കുമെന്നും മന്ത്രി ഉറപ്പുനല്‍കി. അതേസമയം, കേന്ദ്ര സര്‍ക്കാര്‍ സംസ്ഥാനത്തിനുള്ള മണ്ണെണ്ണ അലോട്ട്മെന്റ് വന്‍തോതില്‍ വെട്ടിക്കുറയ്ക്കുകയാണെന്നും ഇത് റേഷന്‍ വിതരണത്തെ ബാധിക്കുന്നുണ്ടെന്നും മന്ത്രി കുറ്റപ്പെടുത്തി.

### Related Links & Sources
- [Original Story Source](https://thaliparamba.truevisionnews.com/news/374939/onam-kit-2026)