---
title: "ജനങ്ങളുടെ ശബ്ദമായി ഓൺലൈൻ മാധ്യമങ്ങൾ മാറണം; അന്തൂർ നഗരസഭാ ചെയർപേഴ്സൺ വി സതീദേവി"
english_title: "Online Media Should Be Voice Of People Anthoor Chairperson V Sathi Devi"
publisher: "thaliparambanews.in"
canonical_url: "https://thaliparamba.truevisionnews.com/news/383394/online-media-voice-of-people-v-sathi-devi-anthoor"
published_at: "2026-09-19T10:52:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aae1c1bf1a48_1000864639.jpg"
keywords: ["V Sathi Devi News", "Online Media News", "Taliparamba News", "Kannur News"]
---

# ജനങ്ങളുടെ ശബ്ദമായി ഓൺലൈൻ മാധ്യമങ്ങൾ മാറണം; അന്തൂർ നഗരസഭാ ചെയർപേഴ്സൺ വി സതീദേവി

> **Lead Summary:** **തളിപ്പറമ്പ്: **കാലത്തിനനുസരിച്ച് മാധ്യമ പ്രവർത്തന രീതികളിൽ വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നതെന്നും, ജനങ്ങളുടെ പ്രശ്നങ്ങളും സമൂഹത്തിന്റെ ആവശ്യങ്ങളും അതിവേഗം പൊതുസമൂഹത്തിന്റെയും അധികാരികളുടെയും ശ്രദ്ധയിൽ എത്തിക്കുന്നതിൽ ഓൺലൈൻ മാധ്യമങ്ങൾക്ക് നിർണായക പങ്കുണ്ടെന്നും അന്തൂർ നഗരസഭാ ചെയർപേഴ്സൺ വി സതീദേവി പറഞ്ഞു.

## Article Content

**തളിപ്പറമ്പ്: **കാലത്തിനനുസരിച്ച് മാധ്യമ പ്രവർത്തന രീതികളിൽ വലിയ മാറ്റങ്ങളാണ് സംഭവിച്ചുകൊണ്ടിരിക്കുന്നതെന്നും, ജനങ്ങളുടെ പ്രശ്നങ്ങളും സമൂഹത്തിന്റെ ആവശ്യങ്ങളും അതിവേഗം പൊതുസമൂഹത്തിന്റെയും അധികാരികളുടെയും ശ്രദ്ധയിൽ എത്തിക്കുന്നതിൽ ഓൺലൈൻ മാധ്യമങ്ങൾക്ക് നിർണായക പങ്കുണ്ടെന്നും അന്തൂർ നഗരസഭാ ചെയർപേഴ്സൺ വി സതീദേവി പറഞ്ഞു.

ജനാധിപത്യത്തിന്റെ നാലാം തൂണായാണ് മാധ്യമങ്ങളെ പൊതുവെ വിശേഷിപ്പിക്കുന്നത്. എക്സിക്യൂട്ടീവ്, ലെജിസ്ലേച്ചർ, ജുഡീഷ്യറി എന്നീ സംവിധാനങ്ങൾക്കൊപ്പം ജനാധിപത്യത്തിന്റെ സംരക്ഷണത്തിലും സമൂഹത്തിന്റെ പുരോഗതിയിലും മാധ്യമങ്ങൾക്കും വലിയ ഉത്തരവാദിത്വമുണ്ട്. പ്രത്യേകിച്ച് ഡിജിറ്റൽ കാലഘട്ടത്തിൽ ഓൺലൈൻ മാധ്യമങ്ങളുടെ സ്വാധീനവും പ്രസക്തിയും കൂടുതൽ വർധിച്ചുവരികയാണ്.

സമൂഹത്തിൽ നടക്കുന്ന കാര്യങ്ങൾ ജനങ്ങളിലേക്ക് എത്തിക്കുക എന്നതിൽ മാത്രം മാധ്യമ പ്രവർത്തനം ഒതുങ്ങരുത്. സാധാരണക്കാരുടെ പ്രശ്നങ്ങൾ, അധികാരികളുടെ ശ്രദ്ധയിൽപ്പെടേണ്ട വിഷയങ്ങൾ, ജനജീവിതത്തെ നേരിട്ട് ബാധിക്കുന്ന പ്രശ്നങ്ങൾ, ഉദ്യോഗസ്ഥ സംവിധാനത്തിന്റെ ഇടപെടൽ ആവശ്യമായ കാര്യങ്ങൾ എന്നിവ കൃത്യമായും സത്യസന്ധമായും പൊതുസമൂഹത്തിന് മുന്നിലെത്തിക്കുന്നതിലും ഓൺലൈൻ മാധ്യമങ്ങൾ ശ്രദ്ധ ചെലുത്തണം.

ഒരു വാർത്ത പ്രസിദ്ധീകരിക്കുന്നതോടെ മാധ്യമ പ്രവർത്തനം അവസാനിക്കുന്നില്ല. വാർത്തയിലൂടെ ഒരു പ്രശ്നം സമൂഹത്തിന്റെ ശ്രദ്ധയിൽ കൊണ്ടുവന്നതിന് ശേഷം അതിന് പരിഹാരമുണ്ടായോ എന്നതും മാധ്യമ പ്രവർത്തകർ പിന്തുടരേണ്ടതുണ്ട്. വാർത്ത നൽകുന്നതിനൊപ്പം ജനങ്ങളുടെ പ്രശ്നങ്ങൾക്ക് പരിഹാരം കണ്ടെത്തുന്നതിനുള്ള ഇടപെടലുകൾക്ക് വഴിയൊരുക്കുന്ന മാധ്യമ പ്രവർത്തനമാണ് സമൂഹത്തിന് കൂടുതൽ പ്രയോജനകരമാകുന്നത്.

### Related Links & Sources
- [Original Story Source](https://thaliparamba.truevisionnews.com/news/383394/online-media-voice-of-people-v-sathi-devi-anthoor)