ലഹരിക്കെതിരെ പന്തടിച്ച് വിദ്യാർഥികൾ; ഓപ്പറേഷൻ തൂഫാൻ പെനാൽട്ടി ഷൂട്ട് ഔട്ട് സംഘടിപ്പിച്ചു

കണ്ണൂർ:ഓപ്പറേഷൻ തൂഫാനോട് ഐക്യദാർഢ്യം പ്രകടിപ്പിച്ച് വേൾഡ് വിത്തൗട്ട് വാർ ആന്റ് വയലൻസ് ഫുട്ബോൾ ഫ്രണ്ടിന്റെ സഹകരണത്തോടെ കളക്ടറേറ്റ് മൈതാനിയിൽ സംഘടിപ്പിച്ച പെനാൽട്ടി ഷൂട്ട് അപ്പ് മത്സരത്തിൽ നിരവധി സ്കൂൾ വിദ്യാർത്ഥികൾ പങ്കെടുത്തു. ലഹരിക്കും അക്രമങ്ങൾക്കും യുദ്ധങ്ങൾക്കു മെതിരെ അവർ പ്രതിജ്ഞ എടുത്ത ശേഷം,ഗോൾ മുഖത്തെ ലക്ഷ്യമാക്കി പന്തടിച്ചു.

മത്സരത്തിൽ ഒന്നും രണ്ടും മൂന്നും സ്ഥാനങ്ങൾ യഥാക്രമം കെ. രുദ്രവ് (വാരം യുപിഎസ്),അബ്ദുള്ള റാഷിദ് (എസ് എൻ വിദ്യാമന്ദിർ), പി. സിദ്ധാർഥ് (ചൊവ്വ എച്ച് എസ് എസ്) നേടി. വി.കെ. ആദിലും ( പ്രീമിയർ ഇംഗ്ളീഷ് മീഡിയം), ബി. മുഹമ്മദ് ശ്വാമി ലും (ചൊവ്വ എച്ച് എസ് എസ്) നാലും അഞ്ചും സ്ഥാനത്തെത്തി.

കോർപ്പറേഷൻ കൗൺസിലറും പഴയകാല ഫുട്ബോൾ താരവുമായ കെ. ഉഷാകുമാരി സമ്മാനങ്ങൾ വിതരണം ചെയ്തു.സമാധാനത്തിനും അഹിംസക്കും വേണ്ടി നഗരത്തിൽ നടക്കുന്ന ലോക മാർച്ചിന്റെ കാമ്പയിൻ തുടക്കം കൂടിയായിരുന്നു പരിപാടി.കെ.വി.അഖിൽ, എ. സദാനന്ദൻ, എം.കെ. ദിവാകരൻ,ടി.വി.മോഹനൻ, എൻ.എ. ദയാനന്ദൻ, ആർട്ടിസ്റ്റ് ശശികല എന്നിവർ മത്സരം നിയന്ത്രിച്ചു.മോഹനൻ പൊന്നമ്പത്ത്, പ്രദീപൻ മഠത്തിൽ, കെ.പി. ബാലകൃഷ്ണൻ, കെ.പി.സതീശൻ, മനോജ് കൊറ്റാളി എന്നിവർ സംഘാടനത്തിന് നേതൃത്വം നൽകി.

Content Highlight: Students kick against drugs; 'Operation Toofan' penalty shootout organized.